حدش معاه تليفون عمرو دياب
بناديك تعالى
نفسي اكون زي نوارة نجم مش حاطه فلتر وبتعبر كده من غيره
بس حاعمل ايه مقتنع ان الواحد بعد 28 يناير لازم يكون مختلف
بس بجد أككه يا عمرو
لو حد معاه تليفون عمرو يقولوا ايه اللي انتي بتغنيه ده انت فلول ، انت ماحستش ايه اللي حصل يا عمرو الووو يا عمرو اصحى يا هضبة احنا اتغيرنا ولا انت بتراهن على اننا ماتغيرناش ، لازم تعرف اننا اتغيرنا اوي كمان ومش معنى اننا لسه ماححقناش اللي عايزينه مية في المية يبقى التغير مش جاي، لا يا هضبة خانك زكائك لما تعمل شريط مش فارق نسمعه دلوقتي او قبل 28 يناير
حتى لو عدى تسع شهور مش حاننسى ولا حننام ،
يا جدعان حد يوطي على ودنه ويفهمه احنا مش احنا بعد الثورة
وانا متاكد ان شريطك مش حايعيش زي اللي فاتوا
ده يخلينا نتكلم عن ايه نوع الفن اللي مستنينه دلوقت
اولا انا مش من دعاة التحولات المتطرفة يعني لو ماكنشي عمرو دياب يبقى نسمع فن ثورجي كله نضال رغم انه مطلوب جدا بس يكون معمول حلو ومتعوب عليه
يعني اغنية مطلوب زعيم تحفة جدا واكيداغاني الثورة كانت ملهمة وتستحق تخلد..... بس الثورة الان في مرحلة بناء دولة ونضال من نوع تاني محتاج فن اكثر تعقيد او فن اكثر عمق فن بيتكلم عن بطل من نوع تاني عارف هو عايز ايه ورايح فين وبيحسب حسابات معقدة جدا بأليات في التفكير مختلفة عن قبل كده ,, عايزين فن يورينا السكة قدام عامله ايه عايزين فن الخيال فيه اكتر من الوقاع لان الواقع دلوقتي متلخبط وعايزينه يفكر معانا لقدام ، بس في نفس الوقت الفن اللي من النوع ده مش حايتعمل الا لما احنا نفسنا نكون نجهز ليه ..
انا لسه ماسمعتش حمزة نمرة وتجربته لان مستني الناس تبطل تتكلم عنه علشان احكم بصورة اقل استهلاكية ، بس مستني في نفس الوقت منير حايقول ايه وكمان بترحم على ايام يحي غنام ونوع فنه وافكاره ,
يحي غنام كان بيغني لدلوقتي من اكتر من خمستاشر سنة فاتوا والبوست اللي جاي حاحط كلمات لواحدة من احلى اغانيه
بس انا هنا بوشوش عمرو وبقوله "مين؟؟؟؟ ادهم لبش ....زمنك راح يا كابتن" من فيلم ضحك ولعب وجد وحب للمبدع طارق التلمساني
No comments:
Post a Comment